Норвегияда 24 электрокар қысқы сынақтан өтті

Норвегия автомобиль федерациясы мен Motor.no басылымы қыста 24 электромобильдің жүріс қорын тексеріп қана қоймай, өндірушілер мәлімдеген ақпаратпен салыстырды. Бұл сынақта Еуропада аса танымал емес Polestar 3 үздік атанса, Tesla Model 3 артта қалды.

Электрокарлар жалпы жолда Ослодан солтүстікке қарай жүрді. Ауа температурасы -6 мен +7 градус аралығында болды. Батарея қуаты 10 %-ға түскенде көліктер тоқтап отырды.

Ең ұзақ қашықтықты екі моторлы Polestar 3 Long Range жүріп өтті. Оның нақты жүріс қоры — 531 км. Электромобиль өндіруші мәлімдеген шамаға 5 % (29 км) жете алмады, бірақ паспорттық көрсеткіш бойынша көшбасшы атанды. Tesla Model 3 те дәл сондай қашықтықты еңсерді, дегенмен компания бұл модель 702 км жүреді дейді. Осылайша 24 % айырмашылықпен соңынан санағанда төртінші орыннан көрінді. Ең нашар нәтиже Peugeot e-5008, Voyah Dream және Peugeot e-3008 модельдеріне тиесілі. Соңғысынікі зауыт мәлімдегеннен 32 % төмен.

Максимал жүріс қоры бойынша Kia EV3 пен Porsche Taycan жақсы нәтиже көрсетті. Олар 499 км жүріп, паспорттағы межеге 15 % және 16 % жетпеді. Ал ең аз қашықтықты Voyah Dream жүріп өтті — небәрі 340 км, дегенмен оның батарея сыйымдылығы 108.5 кВт·сағ болған.

Сынаққа қатысқан 24 электромобильдің 17-сі 500-ден астам шақырым еңсере алады делінген. Бірақ бұл межені тек екі автомобиль бағындырды. Норвегияда мұндай сынақ тұрақты түрде өтеді. Бұл елде көбі электрокар қолданады, 2024 жылдың қорытындысы бойынша аккумуляторлы көліктер нарықтың 89 %-ын құраған.