Мыңнан аса жүргізуші жол апатын еуропротокол арқылы рәсімдеп көрді

Биыл 1 қаңтардан бастап ел тұрғындары жеңіл жол апатын полиция мен сақтандыру комиссарын шақырмай-ақ рәсімдей алады. Ол үшін App Store не Google Play-ден арнайы қосымшаны жүктеп алу керек. Бірінші кредиттік бюроның телеграм-каналында 3 қаңтардағы мәлімет бойынша 1099 өтініш түскені жазылған. Алты адам «тіркелді» деген статус алыпты, демек екеуі де қол қойып, декларация Бірыңғай сақтандыру базасына жолданған.

Өтініштердің 60 %-ға жуығынан жүргізушілер өздері бас тартқан, арасында жай сервиске кіріп көргендер бар.

3 қаңтарда 385 өтініш толтыру процесінде тұрса, 33-і бірінші қатысушының, 12-сі екінші қатысушының қол қойғанын күтіп тұрды деді Бірінші кредиттік бюро мамандары.

Еуропротокол жол ережесіне әлі енбеді. Бірақ ІІМ өкілдері Kolesa.kz редакциясына апатты жеңіл рәсімдеуге мүмкіндік беретін түзетулер «Жол жүрісі туралы» және міндетті сақтандыру туралы заңдарға қосылып, 2024 жылдың 1 қаңтарында заңды күшіне енгенін хабарлады. Сондықтан жеңіл апатты еуропротокол арқылы рәсімдеуге заңды негіз бар.