Музейде тұрған Porsche 930 Turbo ұрланды

1975-1989 жылдары шыққан турбоүрлемді 911 (Porsche 930 Turbo) марка жанкүйерлері арасында жоғары сұранысқа ие. Жақсы сақталған көліктің бағасы 250 000 доллардан басталады. Машинаны қатты алғың келгенмен, ақшаң болмаса қайтпек керек?

36 жастағы Дэниел Бойс биыл жазда Сарсотадағы классикалық автомобильдер музейінде тұрған 1977 жылғы Porsche 930 Turbo-ға көз салуы ғажайып емес, дегенмен оның мақсатқа жетуде табандылық танытып, жоспарлы әрекет еткені таңғалдырды.

Келушілер үшін жабық ғимаратта көрмеде тұрған автомобильге қол жеткізу үшін ұры сол маңдағы жеті машинаны орнынан қозғапты. Жүргізуші кілемшесінде жатқан кілт оның жағдайын жеңілдетті деп жазды Carscoops. Қалғанын Бойс мінсіз жасағаны сонша, дабыл жүйесінің шақыртуына келген патрульдік полиция ұрлық болғанын екінші рет барғанда ғана түсінген.

Ұрланған автомобиль бір сәтке бейнебақылау камераларына түсіп, кейін із-түссіз жоғалған. Музей қожайыны жоғалған Porsche-ге ұқсас қоңыр түсті көлік қоймалардың бірінде көзге түсіпті деген хабар алған соң полиция өз жұмысына кірісті.

Ұрлықтан біршама уақыт бұрын Дэниел Бойс 23 жыл бұрын соғылып, қоқыста жатқан 911-дің VIN-кодын пайдаланып, Porsche 930 Turbo-ны тіркегені анықталған. Күдіктінің қалта телефонын тінту кезінде полицейлер қолды болған автомобильге ұқсас көліктің суретін, қойманы ашатын код және ұяшық нөмірі сияқты қосымша айғақзат тауып, спорткардың қай жерде екенін анықтады.

Музейде тұрған Porsche 930 Turbo-ның оқиғасы жақсы аяқталды деуге толық негіз бар. Қылмыскерлер көбіне ұрланған коллекциялық автоны қайтарып алуға еш мүмкіндік қалдырмай, сатып тынады.