Моторы істен шыққан ұшақ Toyota Camry-дің үстіне қонды

Машинамен тас жолда жүргенде аспаннан қауіп төнетінін ешкім күтпейтіні анық. Үй шаруасы жайлы ойланып келе жатқан 57 жастағы әйел мұндай ойға тіпті берілмес еді.

Бірақ дүйсенбі күні Флорида штатындағы I-95 трассасында жергілікті уақыт бойынша 17:45-те оқыс оқиға болды. Сол маңда ұшып жүрген Beechcraft 55 ұшағының екі қозғалтқышы бірдей істен шығып, пилот шұғыл қонуға мәжбүр болған. Сол сәтте тас жолда көлік көп жүргеніне қарамастан, сонда қонудан басқа амал қалмапты.

Ішінде екі адам отырған шағын ұшақ (салмағы шамамен 2 тонна) еш алаңсыз кетіп бара жатқан 2023 жылғы Camry-дің төбесіне төніп келіп, шассиімен жүксалғышқа соғылған. Содан кейін седанның төбесінен сырғып өтіп, бүйірімен құлаған. Шыр көбелек айналған әуе көлігі мыжылып қалған жеңіл машинамен бірге жол ортасына тоқтады.

Ең бастысы, бәрі аман, тек аздап жарақат алған. Ал Toyota Camry сүйегі мықты екенін тағы бір мәрте дәлелдеді.