«Москвич» зауытының ресми телеграм-арнасы екі жаңа өнімнің суретін жариялады. Машина жайлы толық ақпарат берген жоқ. Бірақ тизердегі седан мен кроссовер сұлбасы қытайлық JAC модельдерін еске салады.
2022 жылы шілдеде зауытты қайта іске қосу рәсімі кезінде болашақта шығатын «Москвич» модельдерінің суреті жарияланды. Сол кезде атауы жоқ, тек нөмірленген көліктер «Москвичтің» түпнұсқасы қай марка болатынын аңғартқан.
Солардың бірі үлкен JAC S7 кроссовері болатын. Тизердегі кроссовердің радиатор торы мен оптикасына қарағанда, S7 жаңа «Москвич» болатын сияқты. Қолда бар ақпаратқа сүйенсек, 4.8 метрлік машинаның Ресейде шығатын нұсқасы қазіргі «Москвич 3» сияқты 1.5 литрлік мотормен жүреді, бірақ ол 180 ат күшін (240 Нм) береді әрі вариатормен емес, роботпен жұмыс істейді.
Тизердегі екінші модель — жеңіл автомобиль. Зауыт оны седан деп атағанымен, былтыр жазда мұндай «Москвичтің» түпнұсқасы Sehol A5 Plus лифтбегі екені белгілі болған. Оның үстіне A5 Plus пен тизердегі жаңа өнімді артқы тірек пен капот формасы байланыстырып тұр.
Бұл модель 190 ат күшіне ие 1.5 литрлік турбомотормен жүреді. Лифтбек механикалық қораппен жабдықталмайды. Қытайда түпнұсқа модельдің ұзындығы — 4.77 метр.
«Москвич» JAC-пен серіктес екенін және қазіргі «Москвич 3-тің» түпнұсқасы осы марканың өнімі екенін ресми растаған жоқ. Бірақ қайта жаңғырған марканың алғашқы моделі аталған автоөндірушінің кроссовері екені белгілі. Демек 5 және 6 индексті «москвичтер» де JAC көліктері болады.
Зауыт 2023 жылы 50 мың автомобиль шығаруды жоспарлап отыр. Оларды қалай өткізетіні белгісіз. Ақпанда небәрі 57 бензинді кроссовер мен онға жетпейтін электромобиль сатылды. Бірақ «Москвичті» таксопарк, каршеринг және мемлекеттік органдар алады деген ақпарат бар. Мысалы, Мәскеу жол полициясы «Москвич 3» мініп жатыр.
Комментариев: 0