Өткен аптада неміс басылымдарында жарияланған ақпарат ел назарын аударды. Онда сарапшы Феликс Домкенің америкалық заң фирмасының тапсырысы бойынша Mercedes-Benz-тің дизельді моторын зерттегені жазылған.
Оның айтуынша, 2016 жылғы E-Class-қа қойылған OM642 моторында ауаға зиян газ деңгейін түзететін сегіз түрлі жүйе бар. Сарапшы көлік жүрген кезде газ шығару жүйесінен шығатын азот оксидінің (NOx) мөлшері рұқсат етілген шектен 500 %-ға артық болуы мүмкін екенін айтады, бірақ зертханадағы сынақ кезінде машина стандартқа сәйкес нәтиже көрсетеді.
Жүйелер бір уақытта қосылмайды, кей бөлігі белгіленген қызмет ету мерзімінің 1 %-ы өткеннен кейін автоматты түрде жұмыс бастайды. Ал қосымша бөліктер 20 %-ға жеткеннен кейін ғана іске қосылады. Осылайша электроника Sport режиміне ауысқанда AdBlue сұйықтығын бүрку айтарлықтай төмендейді.
Домкенің мәлімдемесіне Германияның Федералды автомобиль басқармасындағы (KBA) шенділер Mercedes-Benz-ті жақтап пікір білдірді. Олардың айтуынша, билік автоөндіруші пайдаланатын сегіз жүйенің бәрінен хабардар, әрі оларды заңсыз деп санамайды.
Mercedes-Benz те осы ұстанымда. Компания өкілі британиялық Autocar басылымына барлық жүйе ауаға зиян газды бақылау кешенінің бөлігі екенін айтты.
Айта кетерлігі, бұған дейін Daimler 800 мыңдай дизельді көлікті сынақ кезінде зиян газды азайтып көрсететін заңсыз электроникасына байланысты кері қайтаруға мәжбүр болған еді.
Комментариев: 0