23 ақпан күні кешке W206 индексті Mercedes-Benz C-Class-ты ресми түрде ел назарына ұсынды. Шара барысында марка өкілдері седан мен универсалды көрсетті.
Машина алдыңғы буын платформасына негізделген. Компания мамандары аспасы жетілдірілген көліктің жайлы әрі жақсы басқарылатынын айтты.
Модель сырттай қатты өзгермеген. Жаңа стильде жасалған автомобиль арт жағынан S-Class W223-ті еске түсіреді. Буыны ауысқан машина сәл іріленіп, көлемі 65 мм-ге артты.
Дизайнерлер жаңа көліктің интерьерін W223-ке ұқсатып жасапты. Аспаптар панелінің орнына көлденең экран (10.25-12.3 дюйм), ал мультимедиа мен басқа функцияларды басқару үшін тік экран (9.5-11.9 дюйм) орнатылған. Қосымша ақша төлеп, одан үлкен дисплей қоюға болады.
С-Class пен S-Class арасында айырмашылық та аз емес. Ол алдыңғы панель мен дефлектор пішінінен, сонымен қатар есік картасының дизайнынан байқалады.
Бұрын хабарланғандай, C-Class-та 6 не 8 цилиндрлі мотор болмайды. Бірақ қатарлы төрттік 48 вольт стартер-генератормен бірге гибрид құрамында ұсынылады.
Бензинді моторлар топтамасында 1.5 және 2 литрлік қозғалтқыштар бар. Алғашқысы 170 және 240 ат күшіне ие, ал 2 литрлік агрегат 258 ат күшін береді. Дизельді мотор жалғыз (атауында M әрпі бар жетілдірілген OM654). Нұсқасына байланысты ол 163, 200 не 265 ат күшін береді.
Немістер PHEV нұсқасын да ұмытпапты. С300e 204 арғымағы бар турбомотор мен көлемі 25.4 кВт·сағ батареялы 129 ат күшіне ие электромотордан тұрады. Олар бірігіп 313 ат күші мен 550 Нм айналу моментін береді. Жүріс қоры 100 шақырымға жетеді.
Еуропада машина наурыздың соңында сатыла бастайды. Бағасы әзірше белгісіз.
Комментариев: 0