Mercedes-Benz-тің оптикасы үш сәулелі жұлдыз пішінді болады

Қыркүйектің басында Mercedes-Benz сериялық CLA-ге айналған шағын электромобиль концептісін таныстырды. Машина брендке тән үш сәулелі жұлдыз есебінен өте ерекше көрінеді. Жаңа оптика дизайнерлік шешім емес, келешек электрлі «мерседестің» негізгі элементі болады.

Британиялық Autocar басылымының журналистеріне берген сұхбатында Mercedes-Benz-тің бас дизайнері Горден Вагенер сериялық Concept CLA-де ішінара өзгеріс болады, десе де ерекше оптикасын сақтап қалады деп мәлімдеді. Қазір нарықтағы электромобильдерді бір-бірінен ажырату қиын. Сол үшін дизайнер есте қаларлық дүние ойлап тапқысы келеді және шамның өзгеше дизайны ұтымды шешім болады екен.

Вагенер жарық техникасы электромобильде газ шығаратын түтік сияқты екенін айтты. Мысалы, дәстүрлі қозғалтқышпен жүретін машинаны әрлейтін дизайнерлер газ шығаратын түтікке аса мән берсе, электромобильдің оптикасын назарға алады.