Mercedes-Benz S-класс пен EQS өндірісін қысқартады

Handelsblatt өндірушінің мәлімдемесіне сілтеме жасап, Mercedes-Benz флагмандық S-класс пен EQS өндірісін азайтады деп жазды. Екі модельді құрастыратын Зиндельфингендегі зауыт жұмыс режимін екі ауысымнан бір ауысымға ауыстырады. Оған 2024 жылдың бірінші жартысында көлік онша өтпей қалғаны себеп болды.

II тоқсандағы есеп бойынша компания оң нәтиже көрсеткенмен, табысы аз. Биыл қаңтар мен маусым арасында Mercedes-Benz саудасы 2023 жылдың бірінші жартысымен салыстырғанда 6 % төмендеді, ал электромобиль саудасы бірден 17 % құлдыраған.

Биыл алғашқы алты айда Mercedes-Benz S-кластың танымалдығы 22 % төмендеді. Ірі EQS электролифтбэгі де аз өтіп жатыр, әсіресе АҚШ-та сауда құлдырап кеткен. Артық өнім шығармау және шығынды азайту үшін марка екі модельдің өндіріс көлемін азайтуды шешті.

Компания Зиндельфингендегі Factory 56 зауытының өндіріс желісі нарықтағы жағдайдың өзгерісіне жылдам бейімделетінін айтты. Қажет болған кезде өндіріс көлемін арттыруға мүмкіндік бар.

Mercedes-Benz 2025 жылы нарыққа шығатын флагман седанының жаңарған нұсқасын сынақтан өткізіп жатыр. S-кластың сырт пішіні аздап өзгереді, ал салон архитектурасы толық жаңарып, HyperScreen супердисплейінің жаңа нұсқасы пайда болады.