Mercedes-Benz EQS-тің мұрагері болмайды

Mercedes-Benz онжылдықтың аяғына қарай сұйық отынмен және батареямен жүретін модельдерді екі бөлек топтамаға бөлу идеясынан бас тартады. Бренд басшысы Ола Каллениус Autocar басылымына берген мәлімдемесінде S-класс седаны буын алмастырғанда бензинді және гибрид қозғалтқышпен, сондай-ақ электрокар ретінде де шығады деді. Бұл қазіргі EQS лифтбэгінің екінші буыны шықпайды дегенді білдіреді.

Компания BMW қолданған саясатты қолға алды. Бавариялық концерн флагмандық 7-серияның барлық нұсқасын бір атаумен біріктіріп жатыр. 2030 жылға қарай S-класс топтамасы да осындай болады. Ола Каллениус барлық жоспарланған модификация біркелкі дизайнға ие болады деп уәде етті. Іштен жанатын қозғалтқышы мен электромоторы бар төрт есікті көлік техникалық жағынан әртүрлі болады.

Сұйық отын тұтынатын S-класс буын алмастырғанда MRA платформасын сақтап қалса, электрлі седан MB.EA Large архитектурасын аяқтайды. Бұған дейін Mercedes-Benz жақсарту жұмыстарына қаражат жұмсағысы келмейді деген болжам болған, бірақ компания басшысы мұны жоққа шығарды.

Mercedes-Benz EQS және S-класс конвейерден түспей тұрып 2025 және 2026 жылдары рестайлингтен өтеді. Дәстүрлі мотормен жабдықталған жаңа S-класстың артынан E-класстың келесі буыны да шығуы мүмкін, өйткені бұл екі модель техникалық жағынан тығыз байланысты. Электрлі Mercedes-Benz EQE де тарих қойнауына кететін сияқты.

Әзірге компания флагмандық модельдерге сұраныстың төмендеуімен күресуде. Биыл S-класстың әлемдегі саудасы шамамен үштен бірге азайып, Зиндельфингендегі зауытта седан өндірісінің қысқаруына әкелді. Бұрын үш ауысыммен жұмыс істеген кәсіпорын енді бір ауысымға көшеді.