Mercedes-Benz электрлі G-class-тың мүмкіндіктерін көрсетті

Компания электрлі G-Class-тың жол жоқ жермен жүру сынағынан қалай өткені түскен видео жариялады. Түсірілімге жүргізуші Сара Харманнан бөлек жобаның бас инженері Фабиан Шоссау мен компания басшысы Ола Каллениус қатысты. Олар көліктің техникасы туралы мәлімет бермегенмен, электрокардың жолсыз жерде жүру мүмкіндіктерін толық дерлік көрсетті.

Түсірілім «Гелендваген» шығаратын Аустрияның Грац қаласына жақын Шокл тауындағы соқпақта өтті. Видеода жол талғамайтын көлік тасты беткейлерге көтеріліп, диагональ асудан өтті, жасанды трамплиннен секіріп, танк сияқты кері бұрылғанын көрсетті. Мұны компания G Turn деп атайды.

Ола Каллениустың айтуынша, электромобиль жүргізушісіне 360 градустық бұрылыс та, көлікті тек 90 градусқа бұру да қолжетімді болады. Компания G Turn бұрылысы көбінесе шоу әсерін берсе, 90 градустық бұрылыс орман сияқты шектеулі, жолсыз жерде жүргенде пайдалы болады деп есептейді.

Mercedes-Benz электрлі G-Class төрт қозғалтқышпен жабдықталатынын тағы растады, бірақ олардың қуаты әлі жарияланбады. Батареяны қорғаудың бірқатар жүйесі де сөз болды: көміртектің екі қабатынан тұратын арасында инновациялық материалы бар арнайы «сэндвич» батареяларды соққыдан және кешіп өткенде су кіруінен қорғайды.

Әзірлеушілер көліктің сырт пішінін айтарлықтай өзгертпейтінін де растады. Электрокар дизайнындағы аэродинамикалық ерекшеліктер арқасында ғана көзге түседі. Сонымен қатар жаңа өнімнің салоны 12 минуттық видеода бір-ақ рет жылт етті, соның өзінде түсірілімге сынақ прототипі қатысқанын түсінуге болады. Салонды әзірлеу әлі аяқталмаған сияқты.

Модель өзінің рамалық құрылымын сақтайды, тәуелсіз алдыңғы аспа және жаңа, арнайы жасалған артқы белдеммен жабдықталады деп күтілуде. Электрокардың премьерасы тек келесі жылдың бірінші жартысында өтеді.