Mercedes-Benz 600 жаңа S63-тің жабдығын алды

1960 жылдардағы W100 шанақты Mercedes-Benz 600 неміс маркасының аңызға айналған модельдерінің қатарына кіреді. Бірақ калифорниялық тюнерлер классиканы өздерінше әрлеп көрді.

Эд Саркисян жетекшілік ететін S-Klub шеберханасы Техастағы ескі сарайдан табылған 1971 жылғы көліктің тозған шанағын қайта жаңартып, оған гибрид S 63 E Performance-тың жабдықтарын орнатты. Бөлшектерді апатқа ұшыраған машинадан емес, салоннан 200 мың долларға сатып алған.

Донорды таңдауға W100 мен V223-тің дөңгелек базасы сәйкес келуі себеп болған. Соның арқасында винтаж шанақ бейімді аспа мен 4 литрлік битурбо V8 және гибрид блоктан тұратын күштік құрылмы бар (800 ат күшіне ие) шассиге сай келе кетті.

Шеберлер W100-ге механикалық жабдықтармен бірге донордың бүкіл электроникасын қоса көшірді. Атап айтқанда, фирмалық электрондық көмкшілер жинағы, гиперэкраны бар MBUX мультимедиа жүйесі, массаж функциясына ие кресло сияқты жайлы опциялар ескі модельге сән беріп тұр.

1 / 7

• 
• 
• 
• 
• 
• 
• 

1 / 7

Жаңа AMG-дің жолтабаны кеңірек болғандықтан, тюнерлер «алтыжүздіктің» классикалық сырт пішінін біршама өзгертті. Автомобильдің алды-артына үлкен қанат орнатып, V223-тің түпнұсқа детальдерінен жасалған жаңа бампер қойды. W100-дің шамының корпусын 3D сканерлеп, S63-тің жарықдиодты блогын орналастыру үшін жөндеді. Автомобиль қанық жасыл түске боялған, машинаның төбесінде, айнасында және бастырық элементінде карбон декор көзге түседі.

Ателье жаңғырған W100-ге Final Boss деген атау беріп, SEMA Show көрмесінде жұрт назарына ұсынды. Бірақ жұрт пікірі екіге жарылды, бірі мақтап, бірі даттап жатыр. Сын айтушылар артқы антиқанат пен радиатор торының ортасындағы Mercedes эмблемасын ұнатпай отыр.