Mercedes-AMG C63 гибриді немістерге ұнамады

Mercedes-AMG C63 SE Performance-тың екі литрлік қозқғалтқышы артқы осьтегі электромотормен бірге 671 ат күші мен 1000 Нм-ден көп момент береді, соның арқасында модель марка тарихындағы ең өнімді С-класс өкілі атанды.

Инженерлер командасы көліктің қуатын арттырып, озық технология қоссақ, клиенттер цилиндр азайғанын байқамай қалады деп үміттенген. Алайда мәселе құжаттағы санмен шектелмейді.

MB Passion Blog басылымы бірнеше дилермен сөйлесіп, электрлі Mercedes-AMG C63 алатындар жоққа таяу екенін анықтаған. Сатушылар халыққа мотор көлемі аз көліктің тым қымбат бағалануы ұнамағанын айтыпты.

Мәселен, Германияда біз сөз етіп отырған модельдің бағасы 114 888 еуродан басталады, ал оған ұқсас BMW M3 Competition xDrive-тың ең арзаны 100 300 еуро тұрады. Бавариялық машина алғашқы жүздікті еңсеруге көбірек уақыт жұмсайтынын және талпақ «танауы» көп адамға ұнай бермейтінін ескергеннің өзінде, «мерседес» тым қымбат көрінеді.

Кезінде танымал болған машинадан жұрттың бұлай теріс айналуына тағы бір себеп бар. Mercedes-AMG C63 дәстүрлі қозғалтқышы бар түрінен әлдеқайда ауыр екен, ал жылдамдығы 200 шақырымнан асса, аккумулятор қызып кетуі мүмкін. Оның үстіне жүргізушілер V8-ге ғана тән гүрілге үйренген.