Келеңсіз оқиға өткен түні сағат 20:50-де Қарағандыдағы Степной-4 шағынауданында болды. Қарағанды облысы Полиция департаментінің баспасөз қызметі хабарлағандай, Lexus LX 570-ті мас күйінде тізгіндеген 49 жастағы жүргізуші аулада тұрған бес көлікті соққан. Апат салдарынан зардап шеккен 25 жастағы ер адам мен 29 жастағы әйел адам ауруханаға жеткізілді.
Оқиға орнында куәгерлер түсірген бейнежазбадан жол талғамайтын көлік жүргізушісінің теңселіп әрең тұрғанын байқауға болады. Жол апатын жасаған ол рөлде отырып ұйықтап қалған, ал оянғаннан кейін, біреуге хабарласа бастайды. Аталған дерек бойынша ҚР ҚК-нің 345-бабының 2-бөлігімен сотқа дейінгі тергеп-тексеру жұмыстары басталды. Тиісті сараптама тағайындалып, тергеу жүргізілуде. Аталған бапқа сай маскүнем екі жылға дейін бас бостандығынан айыру жазасына кесілуі мүмкін.
Комментариев: 0