Car and Driver хабарлағандай, 55 жастағы бельгиялық маманның 29 сәуірде жұмыстан босатылуы көпшілік үшін күтпеген жағдай болды. Hyundai-мен жылы қоштасқан Люк Донкервольке басқа фирмада жұмыс істеуге ниетті емес, ол өзін отбасына арнағысы келеді.
«Мен үшін Hyundai, Kia және Genesis-тің болашағын құруға үлес қосу үлкен мәртебе болды. Олардың батыл әрі озық позициясы маған шекараны кеңейтіп, статус-кво түсінігіне қарсы шығуға мүмкіндік берді» — деді дизайнер.
Люк Донкервольке соңғы жылдардағы Hyundai Kona, Palisade және Sonata, жаңа Elantra мен Tucson сынды жобалардың барлығына жетекшілік етті. Люкстік Genesis бөліміне аса мән берген ол марканың қазіргі стилін жасады.
Дегенмен, Донкервольке қызметтік мансабының басым бөлігін Volkswagen өнімдерінің дизайнын жасауға арнады. Ол Skoda Octavia және Fabia, Audi A4 Avant және Audi A2, Seat Ibiza, сонымен қатар Lamborghini Diablo VT, Murcielago, Gallardo және Bentley Flying Spur үлгілерін әзірлеуге еңбек сіңірді.
Люк Донкерволькенің Hyundai Motor Group дамуына қосқан үлесін жоғары бағалаған зерттеу және әзірлеу бөлімінің жетекшісі Альберт Бирманн: «Ол біз үшін көптеген жобаларға жан бітіріп, компанияны жаңа деңгейге көтерген тамаша көшбасшы болды» — деді.
Hyundai Motor Group басшылығы босаған лауазымды кім иеленетінін әлі шешкен жоқ. Донкерволькенің орынбасарлары әзірше бұрынғы орындарында отыр: Санджип Ли Hyundai мен Genesis дизайнына жетекшілік етсе, Карим Хабиб Kia үшін жауапты.
Комментариев: 0