Премиум санатындағы Lucid Air электроседаны өз отаны АҚШ-та жыл соңында сатыла бастайды. Клиенттер екі нұсқаның арасынан таңдау жасай алады. Артқы жетекті базалық Pure нұсқасы 69 900 доллар тұрады, 480 ат күші бар, жүріс қоры 650 шақырым. Ал Dream Edition үздік нұсқасының бағасы 161 500 доллар, машина толық жетекті, 1080 ат күшіне ие, 810 шақырымды еркін еңсереді. Бұл Tesla мен Porsche-нің деңгейлес модельдерінің мүмкіндігінен асып түседі.
Lucid Motors компаниясы (Tesla-ның бұрынғы инженері құрған) машинаның интерфейсі туралы видео жариялап, Air интерьерінің ерекшелігін көрсетті. 34 дюймдік Glass Cockpit деп аталатын ойыс дисплей орнатылған, ол үш секторға бөлінеді. Экранның сол жағы бірқатар көмекші функцияға жауап береді. Ортада аспаптар кластері орналасқан. Ол жылдамдық пен жүріс аумағын және жол жағдайын нақты уақыт режимінде көрсетеді. Экранның оң жағында мультимедиаға арналған функциялар бар.
Ортаңғы консольдегі климат пен орындықты баптауға арналған қосымша тачскрин түртіп қалсаңыз ішке қарай кіреді де, экран артындағы зат сақтайтын қуысты қолдануға мүмкіндік береді. Бұл құрылғы осындай ерекше ойыншықтарды ұнататындардың көңілінен шығады.
Комментариев: 0