Тартымдық аккумулятордың электромобиль құрылымындағы анағұрлым шығынды компонент екені жасырын емес, ал оны құрастырудағы аса маңызды материал литий болып табылады. Литий-ионды аккумулятордың тек автоөндірісте ғана емес, тұрмыстық электроника жасауда да кеңінен қолданылатынын ескерсек, бұл минералдың құнын асыра бағалау қиынға соғатын сияқты.
АҚШ Энергетика министрлігінің Энергиялық тиімділік және энергияның жаңғырмалы көздері бойынша басқармасы берген деректерге сәйкес, литийдің жалпы көлемінің 91 %-ы Австралиядан (44 %), Чилиден (34 %) және Аргентинадан (13 %) жеткізіледі. Бұл дерек іс жүзінде қазіргі электрониканың ғұмыры аса маңызды шикізаттың аталған елдердегі өндірісіне тікелей тәуелді екендігін білдіреді.
Келесі маңызды элемент — кобальт. Кобальт өндірісінің 59 %-ы Конгоның үлесінде. Бұл елде жүріп жатқан соғыс, төңкеріс, дін және этносаралық қақтығыстар салдарынан туындаған тұрақсыз жағдай Африка үшін қалыпты саналатын шығар, алайда, егер бұл тау-кен ісіне әсер етіп, Конго әлем елдеріне кобальт жеткізуді тоқтатса не болмақ?
Сонымен қатар, электромобиль батареяларын дайындауда 67 %-ы Қытайда өндірілетін табиғи графит қолданылады, бұл аспан асты елінің аталған шикізатқа тәуелді елдерге қысым көрсетуіне мүмкіндік береді. Аккумулятор үшін аса маңызды никель мен марганец жер бетіне анағұрлым біркелкі тараған, оны өндіретін негізгі елдер қатарында Қазақстан да бар.
Комментариев: 0