Lexus LS-пен қоштаса ма

Компания LS-тің Heritage Edition деп аталатын арнайы нұсқасын көрсетті. Мұндай седан 2026 жылы АҚШ нарығындағы жалғыз LS болады. Америкадағы басылымдар жақында флагман өндірістен алынады деп болжады. Дегенмен өз отанында LS жаңарды.

Lexus-тің Америкадағы бөлімшесі LS Heritage Edition-ді премиум брендтің алғашқы моделіне құрмет дейді. Бренд автомобильді Ninety Noir деп аталатын жаңа қара шанақ және ашық қызыл интерьермен ұсынады. Дизайнерлер LS-тің салонын бірінші рет осылай әрледі. Төрт есікті көлік бірегей 20 дюймдік дискілер және арнайы тақтайшалар алды.

Heritage Edition нұсқасы LS 500-ге негізделген, толық жетекті көлік капотының астында 415 ат күшіне ие 3.4 литрлік V6 тұр. Оның бар болғаны 250 данасы жарық көреді. Бастапқы бағасы — 99 280 доллар (54 млн теңге). Дилерлерге күзде жетеді.

Жапонияда Lexus LS жаңарды. Жаңа шанақ түстері пайда болды, алдыңғы орындықтар мен артқы диван жылытқыш базалық жинаққа кіреді, F Sport түрленімі жақсарған тежеуішпен жабдықталады. Компания модельді өндірістен алатынын әзірге ресми түрде хабарлаған жоқ. LS седаны Lexus топтамасына 1989 жылы қосылған. Қазір бесінші буыны жасалып жатыр, ол 2017 жылы конвейерге тұрып, 2020 жылы рестайлингтен өткен.

Бұған дейін IS моделінің де болашағы бұлыңғыр деген сыбыс тараған, бірақ марка одан бас тартпай, қазіргі буындағы седанды жаңартуды жөн көрді.