Squadra Corse спорттық бөлімі мен Centro Stile дизайн студиясы әзірлеген Lamborghini Essenza SCV12 — FIA талаптарына толық сай келетін болид. Су жаңа машина иесін шабандоз болуға үйретіп, оның қабілетін кәсіби деңгейге көтеруді мақсат етеді.
«Эссенца» Lamborghini моторларының ішіндегі ең қуатты 830 ат күшіне ие V12-мен жабдықталған. Ол айналу моментін артқы дөңгелекке беретін алты сатылы X-trac қорабымен жұптаса жұмыс істейді. Темір тұлпардың жылдамдығы сағатына 250 шақырымға артқанда, қысу күші 1 200 келіге жетеді. Тежеуіш дискілері мен суппортын Brembo Motorsport компаниясы жасаған.
Жүргізуші өзін нағыз шабандоз секілді сезіну үшін Essenza SCV12 кокпиті Формула 1 жарысына қатысатын көліктердікіне ұқсатып жасалды.
Lamborghini Essenza SCV12-нің бәрі алдын ала сатылып кетті. Бірақ қандай сомаға бағаланғаны белгісіз. Қырық көлікті иелеріне жеткізу келесі жылы толық аяқталады. Бұл машиналармен ортақ қолданыстағы жолда жүйткуге тыйым салынғандықтан, темір тұлпарды компанияның Сант-Агата-Болоньезеде орналасқан штаб-пәтеріндегі арнайы тұрақта сақтауға болады. Онда әр машина қашықтан бақылауға мүмкіндік беретін бейнекамера орнатылған жеке бокста тұрады.
Комментариев: 0