Lada Vesta өндірісі артқанмен, көлікте кемшілік көп

Көктемде Тольяттиде қайта шыға бастаған Lada Vesta өндірісі өркендеп келеді. «Российская газета» хабарлағандай, АВТОВАЗ жазда жаңарған модель төрт есе көп шығып, Granta-мен теңескенін мәлімдеді. Биыл 8 айда 200 мыңнан аса Lada көлігі конвейерге тұрды, бұл 2022 жылғы жалпы нәтижеден 11.5 мыңға артық.

Дегенмен проблема да жоқ емес. Мысалы, сапасы сын көртермейтін әрі дұрыс жабдықталмаған «веста» көптің көңілінен шықпай жатыр. Quito.ru машинаға қатысты жиі айтылатын шағымдарды жинады.

Ақ түсті «вестаның» бояуында айырмашылық бар екенін автоөндіруші өзі мойындады. Бампердің реңкі шанаққа қарағанда басқаша, бұған бояу жеткізушінің ауысқаны себеп болған. Сондай-ақ кедергіден өткенде алдыңғы аспадан дыбыс шығады, оған Ресейде жасалған көлденең орнықтылық стабилизаторын орнату себеп болды.

Тағы бір мәселе, стоп-сигнал дұрыс жанбайды. Мысалы, тежеуіш педалін басқанда оң жақ немесе сол жақ стоп-сигналы ғана жануы мүмкін, кейде артқы терезедегі шырақ қана жанады.

Электроникада да ақау бар: аспаптар панеліндегі сервис орталығына баруды ескертетін индикатор өздігінен жанады, кейде аккумулятор қуаты таусылады, спидометр тілі дірілдеп, орталық құлып өздігінен қосылады және т.б. Бұған екі ел кінәлі, өйткені қытайлық электрониканы Ресейдегі «Итэлма» компаниясы шығарады.

Марка Vesta-ға бұрынғыдай TRW тежеуіш суппортын емес, қытайлық LBN фирмасының өнімін орнатқан. Оған арналған қалып (колодка) ресми дилерде ғана сатылады. Мұның шешімі табылды. Жаңарған Vesta-ға екінші буындағы Nissan Cube қалыбын орнатуға болады. Ал өзге ақауды мамандар қалай жөндейтіні қазірше белгісіз.