Lada Қазақстан нарығына оралады

2022 жылы Renault және өзге компонент жеткізушілермен байланысы үзілген соң АВТОВАЗ жұмысы тоқыраған. Компания ішкі нарыққа арналған өндірісті үлкен қиындықпен қалпына келтірді, олар қауіпсіздік жастығы, ABS жүйесі жоқ әрі экологиялық класы төмен өнім шығаруға мәжбүр болды. Ол кезде экспорт туралы ойлаудың өзі артық еді.

Ресейлік автоөндірушінің жағдайы жақсарып келе жатқан сияқты. АВТОВАЗ биыл күзде Қазақстанға Lada-ның барлық моделін әкелуді жоспарлап отыр. Марка өнімдерін Қостанайда құрастырмайды, Тольятти мен Ижевсктен тікелей жеткізеді.

Қазір механикамен жұптасатын 90 ат күшіне ие 1.6 литрлік 8 клапанды мотормен (Еуро-5) жүретін седан және лифтбэк шанағындағы Lada Granta ғана қолжетімді. Автомобиль екі қауіпсіздік жастығы, кондиционер және басқа опциялармен жабдықталған. Комплектациясы туралы нақты ақпарат жоқ, бірақ ең төменгі бағасы 4 990 000 теңге екені белгілі. Демек Granta Қазақстан нарығындағы ең арзан машина атанады. Chevrolet Cobalt-тың базалық нұсқасы бұдан 1 млн теңге қымбат тұрады.

Ресейден келетін көлік болмаса да Қазақстанда Lada саудасы тоқтаған жоқ. Автозауыт қорда сақталған комплекттен машина құрастырып, автосалондар қойма қалған көліктерді сатты. 2023 жылы Қазақстанда 1500 АВТОВАЗ өнімі өтті. 2024 жылы алты айда 422 Lada Granta иесін тапты, оның көбі қаңтар мен ақпанда сатылған. Автосалондар наурызда 3 дана Lada Niva, ақпан мен наурызда бірнеше Lada XRAY сатты.