Lada модельдерінде автомат қорап болмайды

АВТОВАЗ басшысы Максим Соколов болашақта Lada-ның жаңа модельдерінде автомат қорап, турбомотор және толық жетек болмайтынын айтты. Егер жиынтық түріне сай қандай да бір күрделі торап орнату қажет болса, оны шетелден әкеледі.

«Парламентская газета» тілшісінің жуық арада Ресейде жасау мүмкін емес аса маңызды автокомпоненттер туралы сұрағына жауап берген Соколов былай деді:

«Бұл ең алдымен ABS, автомат қорап, сонымен қатар заманауи қозғалтқыш өндірісі. Бұл біз шығаруды жоспарлап отырған кроссоверлерге арналған толық жетек жүйесіне де қатысты».

Топ-менеджер концерннің өз толық жетегі бар екенін атап өтті, бірақ оны тек Niva платформасы үшін қолданады екен.

Құрылымы күрделі компонент жасау мүмкін еместігін Соколов жергілікті нарықтың шектеулі көлемімен байланыстырды. Оның айтуынша Қытай жылына ондаған миллион машина сатады, соның арқасында бөлшектердің өзіндік құнын кәдімгідей түсірді.

Басқаша айтқанда, концерн көліктерінің өте маңызды бөлшектері баяғы күйінде қалады. Бірақ оларды бұрын батыстан жеткізсе, енді Қытай не Ираннан алады.