Lada кроссовері турбомотормен жүреді

KhaDM есімді блогер кәсіпорыннан алдым деп бір презентация слайдын жариялады. Ондағы мәліметке сүйенсек, концерн B+ Cross атауын алған кроссовер прототипін биыл жазда көрсетіп, келер жылы өндіре бастайды екен. Құжатта көліктің мотор гаммасына қатысты дерек те бар.

Зауыттың жұмыс материалдарында HGH деп көрсетілген Lada B+ Cross-тың базалық нұсқалары 1.6 және 1.8 литрлік бізге таныс қозғалтқыштармен жүреді. Бірақ олардың қуаты 120 және 136 ат күшіне жетеді. Агрегаттар 6 сатылы механика не автомат трансмиссиямен жұмыс істейді. Слайдта 150 ат күшіне ие мотор туралы да жазылған. Қазір зауыт гаммасында мұндай жабдық жоқ. Толық жетек туралы сөз қозғалмаған.

Кроссовер Lada Vesta-ға қарағанда биік әрі кең болады. Клиренсі — 210 мм, ал жүксалғыш көлемі — 479 литр. Опциялар қатарына алғаш рет панорамалық шатыр қосылады.

АВТОВАЗ жаңа моделін 8 жыл бойы (жылына 55 мың машина) шығаруды жоспарлап отыр. Оны әзірлеу барысында шетелден алған және бұрыннан бар, бірақ сәл жаңарған бөлшектер қолданылады.

Xray мен Xray Cross-тың ізбасары саналатын машина Lada-ның модельдер қатарында бірінші болып тұрады. Кәсіпорын басшылары жаңа көлік брендке кроссовер сегментіне шығуға мүмкіндік береді деп санайды. Автомобильдің бағасы белгісіз. Xcross-қа қарап болжам жасасақ, B+ Cross 2.25-2.5 млн рубльден (14-16 млн теңге) саудалануы мүмкін.