Lada Iskra-ның алғашқы суреттері жарияланды

Lada Iskra үш түрлі шанақ алады, бірақ компания ресми түрде тек седанды ұсынған. Енді кросс-универсал «Искраның» алғашқы суреттері пайда болды. «Lada Iskra / Лада Искра» паблигінде жарияланған суреттерден Тольяттидегі зауыт сынақ үшін алғашқы экземплярын әзірлегенін көруге болады.

Бұл нұсқа SW Cross деп аталуы мүмкін және седаннан алдыңғы бөлігінің дизайнымен ерекшеленеді. Ол қорғаныш пластинасы имитациясы бар бампермен және ерекше радиатор торымен жабдықталған. Дизайнерлер бес есікті көліктің шанағын бойлай орналасатын бастырық және өзгеше артқы шам жасаған.

Суреттерден дизайндағы басқа да ерекшеліктерді байқауға болады: бесінші есікке қарай түскен шатыр сызығы, рейлингтер, артқы тіректердің пішіні және шамдарға дейін жалғасқан қатпарлар. Интерьер әрлеуінің жаңа нұсқасы да бар.

АВТОВАЗ Lada Iskra-ны Renault — Nissan-ның өзгерген CMF-B платформасына негізделген модель дейді. Сериялық көлікке 90 және 106 ат күші бар атмосфералы мотор орнатылады, трансмиссия гаммасы кеңейеді. 5 сатылы механикадан бөлек, «Вестадан» алынған және бейімдеуді қажет ететін вариатор мен жаңа 6 сатылы механикалық қорап болады.

Жаппай өндіріс мерзіміне келетін болсақ, бастапқыда зауыт клиенттерге ақпан десе, инсайдерлер қаңтар деді. Жақында Тольяттиде жаңа деректер пайда болды: Iskra конвейерге тек 2025 жылдың көктемінде тұрады. Демек, АВТОВАЗ жаңа өнімді дилерлерге жібермей тұрып, автомобиль қорын жинауға бір-екі ай жұмсайды.