Көшедегі шұңқырдың шекті өлшемі стандартқа қосылды

ҚР СТ 1912-2009 «Автомобиль жолдары және көшелер. Пайдалану күйінің нормалары мен талаптары» стандартының жаңа нұсқасы бүгін, 2024 жылдың 1 шілдесінде күшіне енді. Бұрынғы құжат тек елді мекендер арасындағы трассаларды қамтитын, бұл әкімдіктің жолды өзіне ыңғайлы нормативтерге сәйкес жөндеуіне мүмкіндік берді. Салдарынан көлік иелері апталап, тіпті айлап кедір-бұдыр жолмен жүруге мәжбүр болған.

Жаңарған стандарт енді қаланың да, ауылдың да көшесін қамтиды, ал жолға жауапты шенділер онда жазылған барлық норманы сақтауға және орындауға міндетті.

Мәселен, құжатта елді мекендегі жолдарда ұзындығы 15 см-ден, тереңдігі 5 см-ден, ауданы 0.06 ш.м-ден (шамамен 25×25 см) аспайтын ақау (шұңқыр, шөгінді, ойық) болса ештеңе етпейді, ал одан үлкен шұңқыр орталық көшеде болса — 1-3 тәулік ішінде, аудандық маңызы бар жолда кездессе — 5-7 тәулікте, тұрғын үй аумағында тұрса, 10-12 күнде жамалуы керек деп жазылған. Ұсақ шұңқыр пайда болған көшені жөндеуге 5-20 тәулік уақыт беріледі. Бұл жағдайда да, көшенің категориясы маңызды рөл атқарады.

Асфальттағы тереңдігі 2-7 см (тұрғын үй аумағында 3-9 см), ұзындығы 100 метрден асатын жолтабан 5-14 тәулікте жойылуға тиіс. Түсіп кеткен люк қақпағын жұмысшылар бір тәулік ішінде, ал жаңбыр суы түсетін арықтың торын 48 сағат ішінде тегістеуі қажет. Бүлінген қақпақ пен торды білген сәттен 3 сағат өтпей ауыстыруы керек.

• А, Б — магистральдар, жалпы қалалық маңызы бар көшелер,
• В, Г — аудандық маңызы бар көшелер,
• Д, Е — жергілікті маңызы бар көшелер және веложолақтар.

Стандартта жауапты орган қаладағы орталық көшелерді екі сағат ішінде толығымен қардан арылтып, тайғақ болмауын қадағалауға міндетті, ал ауаданаралық көшелерді қар басылған соң төрт сағат ішінде тазалау керек деген норма бар. Өткен қыста Алматыда қар қалың жауып, жол тайғақ болды. Көше тазаланбай, апталап мұз жатқанда шенділер көшені өз нормативімізге сәйкес тазалаймыз, өйткені нақты белгіленген мерзім жоқ деп ақталды. Енді жағдай өзгереді деп үміттенеміз.

Жол мамандары жүктелген міндетті уақытылы атқармаса не істеу керек? eOtinish сервисі арқылы шағымдануға немесе қоғамдық қабылдау орындарына жазуға болады. Kolesa.kz редакциясы бұл расымен жұмыс істейтін схема екеніне көз жеткізген.