Көлікті ғимарат қасына қойғанда сақ болу керек

Оқиға Академик Чокин көшесіндегі азық-түлік базарының маңында болған. Nissan Altima жүргізушісі машинасын сауда үйінің жанына қойыпты. Әлеуметтік желіде тараған видеодан ғимарат төбесінен қар құлай бастағанда жүргізуші көліктен шығып кеткенін көруге болады. Төбеден алдымен аздаған қар түскен, кейін бір үйме қар құлап, Nissan-ды басып қалды. Иесі көлікті қауіпті аумақтан алып шығуға үлгермеді.

Полиция ғимарат директорына қатысты Әкімшілік кодекстің 505-бабы бойынша хаттама толтырды (100 АЕК-ке дейін айыппұл салынады). Ал көлік иесіне ғимаратты қардан тазартуға жауапты компанияның үстінен сотқа арыз жазуға кеңес берді.

Kolesa.kz редакциясы ереже бойынша ғимарат немесе құрылыс иесі шатырды мұз бен қардан уақытында тазалауға міндетті екенін еске салады. Тұрғын үй төбесінен қар немесе мұз құлап, автокөлікті зақымдаса, жергілікті пәтер иелері кооперативіне (ПИК) немесе мүлік иелері бірлестігіне (МИБ) шағымдану қажет, ал бизнес орталығының шатырынан құласа, ғимарат иесіне немесе оны басқарушы компанияға; эстакададан құласа, жергілікті әкімдіктің осы объектіге жауапты бөлімшесіне шағым жазу керек.

Kolesa.kz бұған дейін арнайы мақала жазып, төбеден қар мен мұз құлап, көлік бүлінсе не істеу керек екенін түсіндірген.