Естеріңізге сала кетейік, бірнеше жыл бұрын мемлекеттік туды тиісті емес орындарға ілгені үшін азаматтарға жаза тағайындаған полицейлердің әрекеті қоғамда біраз дау тудырған болатын. Мысалы, 2012 жылы Атырауда көлігіне ҚР туын іліп қойған азаматқа 300 мың теңге айыппұл салынса, 2015 жылы мемлекеттік рәмізді самалдыққа ілген Астана тұрғыны 400 мыңға жуық айыппұл арқалаған еді. Сол кезде шенділер заңға түзету енгізуге уәде берген, бірақ ол уақыт енді ғана жеткен сияқты.
ҚР үкіметінің Қазақстан Республикасының Мемлекеттік Туын, Мемлекеттік Елтаңбасын және олардың бейнелерін пайдалану (орнату, орналастыру) туралы ережеге өзгерістер мен түзетулер енгізу туралы қаулысын 4 шілде күні ресми БАҚ жариялады, заң он күннен кейін күшіне енеді.
Құжатқа сәйкес, «Қазақстан Республикасының Мемлекеттік Туын жеке және заңды тұлғалар патриоттық сезімін білдіру, қазақстандық бірегейлікті, көпшілік іс-шаралар және жеке іс-әрекеттер аясында елдің, оның азаматтарының жетістіктерін қолдау мақсатында пайдалануы (орнатуы, орналастыруы) мүмкін.
Қазақстан Республикасының Мемлекеттік Туы, оның көлеміне қарамастан, ұлттық стандартқа сәйкес келуі тиіс. Жеке және заңды тұлғалардың Қазақстан Республикасының Мемлекеттік Туын ұлттық стандарттардың талаптарын бұза отырып пайдалануына жол берілмейді. Жеке және заңды тұлғалар Қазақстан Республикасының Мемлекеттік Туын қорлау нысанасы ретінде пайдалана алмайды».
Анықтама ретінде айта кетсек, стандартқа сәйкес, Мемлекеттік Ту — ортасында шұғылалы күн, оның астында қалықтап ұшқан қыран бейнеленген тік бұрышты көгілдір түсті мата. Тудың сабының тұсында тік жолақ түрінде ұлттық өрнек нақышталған. Күн, оның шұғыласы, қыран және ұлттық өрнек бейнесі алтын түстес. Тудың ені мен ұзындығының арақатынасы — 1:2.
Комментариев: 0