ҚР ҚМ Мемлекеттік кірістер комитетінің баспасөз қызметі борышкерлер рейтингін жариялады. «Ұмытшақ азаматтардың» тізіміне сәйкес, салық бойынша берешегі ең көп көлік Қарағанды облысының тұрғыны Фадис Мустакимовтың атына тіркелген. Борышкерлер көшін бастап тұрған азамат ел қазынасына 6 081 323 теңге (салық 4 059 318 тенге + өсімақы 2 022 005 теңге) қарыз. Салыстыру мақсатында айта кетсек, бұл ақшаға салоннан кореялық, ресейлік не өзбекстандық седан сатып алуға болады.
Екінші орында ел қазынасына 4 813 566 теңге құюы тиіс қостанайлық Н. Хафизова, үшінші орында Жамбыл облысының тұрғыны Г. Туткушева тұр. Оның мемлекетке берешегі 4 672 444 теңгені құраған. Төртінші орында 4 630 829 теңге қарызы бар алматылық Л. Алимгазина тұрса, «үздік» бестікті астана тұрғыны А. Дмитриенко (4 400 251 теңге) түйіндейді.
Мемлекеттік кірістер комитеті көлік салығы төленуі тиіс соңғы күн 31 желтоқсан екенін ескертеді. Одан бөлек биыл салықтық амнистия жарияланды, оған сәйкес, ел азаматтары негізгі қарызын 31 желтоқсанға дейін төлеген жағдайда өсімақы автоматты түрде алынып тасталады.
- Биыл 19 қыркүйектен бастап қазақстандықтарға көлік салығы туралы SMS арқылы ескерте бастады.
- Қазіргі уақытта Қазақстанда көлік салығын отын бағасына қосу мүмкіндігі талқылануда.
- Сонымен қатар байлыққа салық салу мәселесі де қарастырылып жатыр.
Комментариев: 0