Аяздың беті қайтып, жол құрғайтын күн де алыс емес, яғни жуырда көшеден спорткарлар мен суперкарларды көріп қаламыз. Біздің елде сирек кездесетін автокөліктердің біразы kolesa.kz-те сатылуда. Солардың ішінен анағұрлым тартымды бесеуін таңдап, назарларыңызға ұсынбақпыз.
Сирек әрі жүйрік көліктер тізімін небәрі 7 277 шақырым жүрген 2012 жылғы Mercedes SLS AMG бастап тұр. Екі есікті машина Алматыда. Капот астына 6.3 литрлік атмосфералы V8 орнатылған. 7 сатылы автоматты қораппен жұптаса жұмыс істейтін мотор 531 аттың күшіне ие. 650 Нм момент артқы дөңгелектерге беріледі.
Көлік иесі машина жайлы көп ақпарат бермеген, тек қосымша қаржы жұмсауды қажет етпейтінін жазыпты. SLS AMG-ге иелік ету үшін қалтаңызда 110 млн теңге болуы керек.
Екінші орында Mercedes-AMG GT-S спорткары тұр. Edition 1 нұсқасындағы купенің төбесі карбоннан жасалған, спойлері мен қосымша ақпараттық тақтайшалары бар. Капот астына 523 ат күшін беретін, қосарлы турбоүрлемге ие 4 литрлік V8 орнатылған. Момент артқы дөңгелектерге 7 сатылы AMG Speedshift DCT автомат қорабы арқылы беріледі.
Сатушы 22 000 шақырымды артқа тастаған бұл көліктің біздің елде де, көрші Ресейде де жалғыз екендігін алға тартады. Көліктің бағасы 43 млн теңге.
Алғашқы үштікті Lamborghini Gallardo, нақтырақ айтсақ, Superleggera түйіндейді. Бұл үлгі алғаш рет 2007 жылы Женева автосалонында таныстырылған. Ол әдеттегі Gallardo-дан 100 келіге жеңіл. Машинаға орнатылған 5.2 литрік V10 530 ат күшіне ие және 6 сатылы роботпен жұмыс істейді.
Әлемде рестайлингке дейінгі Gallardo Superleggera-ның 618 данасы бар. Алматыда тұрған бұл темір тұлпар 38 млн теңгеге бағаланып отыр.
Тізімдегі келесі көлік — 2008 жылғы Ferrari 599 GTB. 12 жыл ішінде ол 9 800 шақырымды еңсерген. Оның 6 литрлік V12 моторы 629 күшке ие. Салонында карбон қосымшалар көп және қымбат былғарымен қапталған.
Көлік иесінің сөзіне сенсек, машина күрделі техникалық тексерістен өткен, бронды қабықшамен қапталған және мінсіз жағдайда. Бағасы 38 млн теңгені құрайды.
Үздік бестік тізіміне енген соңғы үлгі — 2003 жылғы Dodge Viper родстері. 16 000 км жүрген үшінші буындағы машина 507 ат күшін беретін 8.3 литрлік V10 моторымен жабдықталған. Артқы жетекті Viper 6 сатылы механикамен жұптасады.
Родстердің иесі оның жағдайының мінсіз екендігін және шанағы қорғаныс қабықшасымен қапталғанын айтып, көлік үшін 18 млн теңге сұрап отыр.
Тағы бір айрықша көлікке жеке тоқталуды жөн көрдік. 15 миллионға бағаланған Audi RS6 бұл тізімдегі ең арзан әрі ең қуатты машина. Оған орнатылған қос гибридті турбокомпрессоры бар 5 литрлік V10 924 ат күшіне ие. Седан жүзге дейін 2.9 секундта екпін алады.
Машинаны польшалық Sportmile ательесі жасаған. Хабарландыру мәтінінде үлгінің Unlim 500+ жарысында бір миляны 27 секундта жүріп өтіп, жылдамдығын сағатына 312 шақырымға арттырғаны жазылған.
Комментариев: 0