Kolesa.kz порталында машина сату туралы 150 мыңнан аса хабарландыру бар. Олардың көбі көз үйренген көліктер. Бірақ арасында көшеден күнде көре бермейтін сирек әрі аса қымбат модельдер кездеседі.
2021 жылғы Mercedes-Maybach GLS 600
GLS — Mercedes-Maybach топтамасындағы алғашқы кроссовер. Ол 2019 жылы қарашада ресми таныстырылғанмен, 2020 жылдың екінші жартысында сатыла бастады. Аса сәнді кроссоверді біздің елде алуға болады. Солардың бірі Kolesa.kz-те 140 млн теңге тұрады.
Салоны наппа былғарысын қоса алғанда, өте қымбат әрі сапалы материалдармен қапталған, артқы бөлігінде арасын MBUX мультимедиа кешенін басқаратын планшеті бар ірі ортаңғы консоль бөліп тұрған дербес орындықтар бар.
GLS қосарлы турбоүрлемді 4 литрлік V8 арқылы қозғалады. Агрегат 558 ат күші мен 730 Нм момент береді. Моторға 22 күшке ие (250 Нм) EQ Boost стартёр-генератор көмектеседі. Салмағы 2.8 тоннаға жуық темір тұлпар алғашқы жүздікті 4.8 секундта алады, ал максимал жылдамдығы сағатына 250 шақырыммен шектелген.
2010 жылғы Mercedes-Benz SLS AMG
Қарапайым SLS AMG-дің өзі біздің жолдарда сирек жүйткиді, ал Brabus бастырығына ие купені бірегей нұсқа деуге болады. Алдыңғы бөлігіне карбон қаптамалар мен ауа өткізгіш, ал арт жағына диффузор, шағын спойлер мен фирмалық титан түтік орнатылған. Жүйенің салмағы небәрі 26 кг.
SLS-ке Brabus Monoblock F Platinum Edition дөңгелектері орнатылған. Алдыңғы дискілері 20 дюймдік, ал артқы дискілердің диаметрі — 21 дюйм. Капот астына 571 «арғымағы» бар 6.2 литрлік атмосфералы V8 қойылған. Агрегат 7 сатылы роботпен жұмыс істейді. Көліктің бағасы — 135 млн теңге немесе 8 биткоин.
2020 жылғы Lexus LM 300h
Lexus жайлы сөз болғанда әдетте біздің елде танымал LX570 пен RX еске түседі. Бірақ марка топтамасында минивэн де бар. Ол 2019 жылы көктемде жарық көрген. Қазақстанда ресми сатылмайды, дегенмен жеке тұлғалар жеткізіп жатыр.
Солардың бірі Kolesa.kz-те сатылады. 2.5 литрлік бензинді моторға негізделген гибрид күштік құрылымы бар машина 120 млн теңге тұрады.
Іс жүзінде LM — өңі өзгерген Toyota Alphard. Салон конфигурациясы екі түрлі нұсқада ұсынылады. Порталдағы көлік жылыту және желдету функциясына ие қымбат түрленімде жасалған. Машинаның жолаушылар отыратын бөлігі жүргізуші жақтан қалқа мен ірі монитор арқылы бөлінген.
2010 жылғы Lamborghini Gallardo
Gallardo италиялық өндірушінің топтамасында 2003 жылы пайда болды, ал сайттағы LP560-4 нұсқасы 2008 жылы Женева автосалонында таныстырылды. Бұл 5.2 литрлік V10 моторы бар суперкардың алғашқы түрленімі. 560 ат күшін беретін агрегат 6 сатылы E-Gear роботымен жұптасады. Машина толық жетекті.
Көлік иесі автомобильдің Қазақстанға 2011 жылы жеткізілгенін жазыпты, содан бері жап-жаңа күйде сақтаулы. Gallardo жолға сирек шығады, күтімі жақсы. Қосымша қорғаныс үшін сұйық керамикамен қапталған. Көлікті алам десеңіз, 110 млн теңге жұмсауға дайын болыңыз.
2019 жылғы Bentley Bentayga
Тізімнің соңына жайғасқан Bentley Bentayga 92.4 млн теңге тұрады. Бір қарағанда стандарт Bentayga-дан ерекшеленбейтін сияқты, алайда бұл кроссовер марканың 100 жылдығына арналған Centenary мерейтойлық сериясының бір бөлігі. Мұндай машиналар бір-ақ жыл шығарылды.
Шын мәнінде Centenary Edition мен қарапайым модельдер арасында айтарлықтай айырмашылық жоқ. Мерейтойлық көлікті капот, жүксалғыш қақпағы мен кілтіндегі бірегей эмблемасынан, зерлі табалдырығы мен салондағы алтын жіппен әрленген тігісінен тануға болады.
Темір тұлпар 550 ат күшіне ие 4 литрлік V8 арқылы қозғалады.
Комментариев: 0