Mercedes-Benz G-Class жайлы сөз болғанда көбі төрт қыры айқын, артында G63 не G55 деген тақтайшасы бар қара түсті жол талғамайтын көлікті елестетеді. Расымен де, біздің елде сатылып жатқан геликтердің басым бөлігі сондай. Дегенмен, аса қымбат болмаса да, шынайы G-Class та жоқ емес.
Біз Kolesa.kz-те сатылып жатқан ең қолжетімді «гелендвагендерді» топтастырдық. Бағасы 4 млн теңгеден аспайтын бұл машиналардың барлығы үш есікті.
Ең арзан G-Class — 1983 жылғы күміс түсті жол талғамайтын көлік. Машинаның жағдайы жақсы деген иесі ол үшін 3 млн теңге сұрап отыр. Капот астына механикалық қораппен жұптаса жұмыс істейтін 3 литрлік дизельді мотор орнатылған. Машина 254 мың шақырымды еңсеріпті.
Екінші орынға 2.3 литрлік бензинді төрттік моторы бар G-Class жайғасты. Ол да механика қораппен жабдықталған. Орындықтары былғарымен қапталған 1990 жылғы темір тұлпар астанада тұр, бағасы 3 млн теңге.
Үшінші орынды топтамадағы ең ескі G300 иеленді. 1981 жылы шығарылған автокөлік Қарағандыда тұр. 3.1 млн теңгеге бағаланған машинаның капот астына автоматпен жұмыс істейтін 3 литрлік дизельді мотор қойылған. Сыртына жеңіл тюнинг жасалыпты. G300 иесі көліктің жақсы жағдайда екенін және күнде жүйткіп жүргенін айтады.
Төртінші орын 1988 жылғы алматылық G230-дің еншісінде. Иесі жасыл түсті көлік үшін 3.5 млн сұрап отыр. Машинаға қосымша жарық жүйесі орнатылып, салоны қайта тігілген. Сонымен қатар, газ баллон қойылыпты.
Бестікті тізімдегі ең жас G-Class түйіндейді. 1993 жылғы G300 285 000 км жол жүрген, қазір Шымкентте тұр. Жол талғамайтын көліктің интерьері жайлы, салоны екі түсті былғарымен қапталған және ағаштан жасалған қосымшалары бар. Шанағы жаңадан боялған машинаның бағасы 3.8 млн теңге.
Kolesa.kz-те бес есікті G-Class бағасы 4 млн теңгеден басталатынын айта кеткен жөн. Бұл ақшаға 1991 жылы шыққан механикалық қорабы бар дизельді G300 ала аласыз.
3 млн теңгеге тағы қандай жол талғамайтын көлік алуға болады?
Мұндай ақшаға Toyota Land Cruiser Prado, Jeep Grand Cherokee, Mitsubishi Pajero, Nissan Patrol, Land Rover Discovery және UAZ Hunter алуға мүмкіндік бар.
Комментариев: 0