Kia қазіргі K5-ті 2030 жылға дейін шығарады

Компания алдағы жылдары K5-тің алтыншы буынын жасаудан бас тартты. Кореядағы басылымдар хабарлағандай, марка 2019 жылдың аяғында шыққан модельдің кезекті, яғни екінші рестайлингін дайындап жатыр. K5 қазіргі кейпінде кемінде 2030 жылға дейін қалады.

Инсайдерлер компания модельдер қатарын электрлендіру үшін буын алмастыруды кейінге шегеріп отыр деді. Мұндай стратегияға көп инвестиция мен уақыт керек, сондықтан бренд қазір сатылып жатқан және әлі сұраныстағы модельдерді толық жаңартпайды. Рестайлингтен өткен седан нарықтағы сұранысты қолайлы деңгейде ұстап тұруға көмектеседі. Kia жылына шамамен 80 мың K5 сатпақшы.

Алдын ала мәлімет бойынша мотор гаммасы мен технологиялық мүмкіндігі өзгереді. Kia K5-тің күштік құрылымына дәстүрлі іштен жанатын қозғалтқыштар және кей нарықта сұранысы біртіндеп артып келе жатқан гибридтер кіреді. Автомобиль Hyundai Motor Group әзірлеген жаңа Pleos OS операциялық жүйесін алады. Көмекші жүйе жинағы кеңейеді.

K5 алғашқы рестайлингтен 2023 жылы өтті. Марка екінші мәрте жаңаратын нұсқаның тұсаукесерін 2027 жылдың бірінші жартысына жоспарлап отыр. Автомобильдің жаһандық түрленімі Қазақстанға ресми түрде келмеді. Елдегі автосалондарда 170 ат күшіне ие 1.5 литрлік қозғалтқыш және робот қорап немесе 240 ат күшін беретін 2 литрлік агрегат және автоматпен жабдықталған Қытайға арналған модификациясы саудаланып жатыр. Бағасы жеңілдіктерді есептемегенде 15.8-20.1 млн теңге аралығында.