Kia маркасының Қазақстандағы өкілдері Tulpar деп аталатын шектеулі серия жасады. Ол біздің елде жақсы өтетін бірнеше модельде қолжетімді. Әзірге Tulpar комплектациясын алғысы келген клиенттер Sorento кроссоверіне не K5 седанына тапсырыс берсе болады.
Sorento арнайы 20 дюймдік дискілері мен алдыңғы қанатындағы тақтайшасымен ерекше көрінеді. Салонына келер болсақ, төбесі алькантарамен қапталған, педальдер металл қаптама алған, Tulpar логотипі бар кілемше тұр. Ол негізінен жеті орынды Luxe нұсқасына сәйкес келеді, бірақ панорамалы шатыры мен 12 динамикті Bose аудиожүйесі болмайды.
Sorento Tulpar 2.5 литрлік мотормен 24 млн теңгеге бағаланса, 3.5 литрлік V6 орнатылған көлік 25.5 млн теңге тұрады.
K5 седанын да айрықша дискілерінен танисыз. Ол да Luxe комплектациясына негізделген, бірақ диск өлшемі 19 дюйм. Салоны басқаша әрленген, фирмалық кілемше мен жүргізушіге арналған жинақ бар. Жабдықтар тізіміне JBL аудиожүйесі, айнала шолу камерасы және жарықдиодты проекциялық фара кіреді.
19 млн теңге тұратын Kia K5 Tulpar 240 ат күшіне ие 2 литрлік турбомотормен жүреді.
Комментариев: 0