Kia 2025 жылы рамалы пикап шығарады

Kia 2025 жылы рамалы пикап шығарады

ТК индексті модельдің дизайны Mohave-ты еске түсіреді.

Kia Аустралиядағы клиенттері асыға күткен пикап жобасын аяқтауға жақын. Автоөндіруші үшін ерекше модель туралы сыбыс үш жыл бұрын тараған, ал былтыр машинаның прототипі бейнеленген алғашқы суреттер фототыңшылардың қолына түсті.

Kia компаниясының өкілімен сұхбаттасқан Car Sales журналистері көліктің кейбір техникалық сипаттамасы мен кодтық атауын анықтапты. Пикап ТК деп аталады. Материалда бір тонна жүк көтере алатын баспалдақ типті рамасы мен 3.5 тонналық тіркемесі туралы да жазыпты. Демек Kia-ның шағын жүк көлігі Ford Ranger және Toyota Hilux-пен бір санатта тұрады.

Бейресми ақпарат бойынша модельдің 2.5 литрлік бензинді моторы бар моножетекті, 2.2 литрлік CRDi (200 а.к; 440 Нм) турбодизелін орнатқан толық жетекті және 6 цилиндрлі 3 литрлік (277 а.к; 588 Нм) турбодизельмен жүретін нұсқалары болады.

Бренд пикапты 2024 жылдан ерте таныстырмайды, тағы бір жылдан кейін сата бастауы мүмкін. Kia бұл жолы да Аустралия нарығына басымдық беретіні анық. Өйткені былтыр мұнда 78 000 машина өткізіп, Toyota және Mazda-мен бірге үздік үштікке кірген.

Комментариев: 0

Чтобы оставить комментарий, вам необходимо зарегистрироваться или авторизоваться.