Ресейде камера анықтайтын жол ережесіне қайшы әрекеттер көбейді. Енді камера бұрыннан таныс жылдамдықты асыру, жол белгілерін елемеу сынды ереже бұзушылықтармен қатар көлік арасындағы қашықтықты да қадағалайды.
РБК хабарлағандай, ресейлік «Астралаб» компаниясы фото және видео жазуға арналған жаңа кешен әзірлеу үстінде. Ереже бұзушыларды анықтау жұмысын нейрожеліге сеніп тапсыру жоспарланып отыр.
Жаңа техника тек қашықтықты ғана қадағаламайды. Оның бақылау шеңберіне жарықтандыру жүйесіне қатысты (шамдар, күндізгі жарық шамдар) ереже бұзу әрекеттері де кіреді.
Жаңа жүйе бақылайтын басты нысана алдыңғы машинаның артқы бамперіне таяп жүретіндер екені сөзсіз. «Астралаб» компаниясының бас директоры Сергей Ласкиннің айтуынша, мұндай әрекет тәжірибесіз жүргізушілердің сасқалақтап, жол апатына ұшырауына себеп болуы мүмкін.
Ереже бұзу әрекеті қатарынан түсірілген бірнеше сурет және видеомен дәлелденеді. Бұл материалдар жауапты тұлғаларға, сотқа (егер жүргізуші келіспесе) жіберіледі, айыппұл салу туралы шешімді солар қабылдайды.
Алайда Ресейдің жол ережесінде жүргізушілер сақтауы тиіс қашықтық нақты белгіленбеген. Бірақ жол-көлік оқиғасын тудырмау үшін алдыңғы көлікке дейінгі арақашықтық жеткілікті болу керек екені көрсетілген. Сондықтан жүргізушілерге жол апаты болған жағдайда ғана көлік құралын жолдың жүру бөлiгiнде орналастыру ережесін бұзғаны үшін айыппұл салынады.
Сондай-ақ біздің елдің жол ережесінде де рұқсат етілген қашықтық нақты емес. Алайда мұндай жағдайға арналған 3.16 «Ең төменгі қашықтықты шектеу» белгісі бар.
Комментариев: 0