КАМАЗ-ға ресейлік мотор қойылады

Бұл туралы «Известия» басылымы автоөндірушінің еншілес сауда бөлімшесі бас директорының дилерлерге жазған хатына сілтеме жасап хабарлады. Құжатта «Наурыздан бастап K3-дың барлық модельдік топтамасына ресейлік беріліс қорабы-154, КАМАЗ моторы, АЗПИ (Алтай дайын өнім зауыты) жанармай аппараты орнатылады. Ресейлік компонентпен жабдықтаған түрленім болмаса, модельге тапсырыс қабылданбайды», — деп жазылған.

Шетелден бөлшек жеткізу тоқтағандықтан, Cummins моторы (АҚШ), ZF беріліс қорабы (Германия) және Bosch жанармай аппараты (Германия) қойылатын модельдер шықпайтын болды. Демек жақында ең заманауи К4 және К5 топтамасының (кабинасы Мерседестен) өндірісі тоқтайды. КАМАЗ енді негізінен К3 сериялы арзан жүк көліктерін шығарады, бұл машинада 70-жылдардағы кабина болады, жаңарғаннан кейін автомат қорабы, пневматикалық аспа және заманауи мотор болмайды. Есесіне оны жөндеу оңай.

Басылымға сұхбат берген сарапшылар кәсіпорынның жұмысы жалғасатынын айтады. Бірақ үкімет шұғыл көмек бермесе, өндіріс көлемі 10–15 %-ға төмендеуі мүмкін. Екінші жағынан алып қарағанда, шетелдік компаниялар кетіп қалғандықтан, Ресейде КАМАЗ көліктерінің үлесі айтарлықтай артады.

Айта кетейік, КАМАЗ Қазақстанның ірі серіктестерінің бірі саналады, ол елімізде бұрыннан бар және жаңа жобаларға, маман даярлауға 233 миллиард теңге инвестиция салған. Қостанайда КАМАЗ жүк көліктеріне арнап автобөлшек шығаратын екі зауыт салынып жатыр. Шойын құю цехын 2023 жылы ашу жоспарланған, жүк көлігіне арналған негізгі беріліс редукторын өндіретін екінші зауыттың құрылысы да қатар жүріп жатыр.