Kaiyi маркалы кроссовер Қазақстанда сертификат алды

Сертификация қытайлық Chery концерні құрамына кіретін Kaiyi маркасына X3 және X3 Pro модельдерін сатуға мүмкіндік береді. Жаңа машинаны бренд екі түрлі мотормен ұсынатынын білеміз, бірақ қашан сата бастайтыны белгісіз.

Екі қозғалтқыштың да көлемі — 1.5 литр. 113 ат күші мен 138 Нм момент беретін базалық нұсқасы тек механика қораппен, одан қуатты агрегат (147 а. к.; 210 Нм) вариатормен жұмыс істейді.

Kaiyi X3 габариті — 4400×1831×1653 мм, дөңгелек базасы — 2632 мм. Бәсекелес Hyundai Creta мен Chery Tiggo 4-тен ірілеу. Біздің елде Tiggo 4 Pro-ның бағасы 10.5 млн теңгеден басталады.

1 / 6

• 
• 
• 
• 
• 
• 

1 / 6

Көлік типін мақұлдау құжатында Kaiyi X3 жабдықтары қатарында круиз-бақылау мен тұраққа қойғанда және күрт тоқтағанда пайдасы тиетін көмекшілерді ерекше атап өтіпті. Құжат бойынша көлік Қазақстанға аспан асты елінен келеді. Автосалонға қашан шығатыны белгісіз, бірақ бір апта бұрын Алматы тұрғындары үш кроссовердің бірін көшеден көрген, бірнеше суретін «Китайские автомобили KZ» телеграм-арнасы жариялады.

Kaiyi маркалы модельдердің бірі Ресейдегі «Автотор» конвейеріне тұруы мүмкін. Бұл ресми расталған жоқ, бірақ зауыттағы құрастыру алаңында түсірген фотодан Kaiyi Xuandu седанын байқауға болады.