Іздеуде жүрген «Азия Авто» акционері Ресейде әскери техника шығарады

Қазақстандағы ірі автобизнесінен айырылып, Ресейге қоныс аударған Анатолий Балушкин 2021 жылы көктемде жаңа отанында «Русские вездеходы Пластун» компаниясын ашты. Жобаны бірнеше жыл бұрын оның ұлы Антон бастаған, олар Өскеменде HUSKY шынжыр табан көлігін шығармақ болған.

Кейін Новосибирскідегі бос тұрған «Азия Авто» дилер-сервис орталығында жол талғамайтын көлік құрастыра бастады. «Русские вездеходы Пластун» компаниясының бас директоры қызметін «Азия Автоның» бұрынғы топ-менеджері Ерік Сағымбаев атқарады.

Әу баста «Хаски» квадроцикл, жүк көлігі, батпақ немесе қар тазалағыш сияқты бейбіт жұмыстарға арналған. Кейін Ресей асып, «Пластун» атанған соң да осы мақсатынан тайған жоқ. Техника тұрақты түрде сатылып жатыр, тіпті белгілі автоблогер оған шолу жасаған.

Бірақ Ресейге қазір соғыса алатын машина қажет, сол үшін компания жол талғамайтын көліктің әскери нұсқасын патенттеді деп хабарлады «Русский автомобиль» телеграм-арнасы.

Техника туралы толық ақпарат жоқ. Бірақ азаматтық түрленімнің техникалық сипаттамасына сүйене отырып, көлемі кіші, қуаты орташа мотормен (106 ат күшіне ие 1.6 литрлік) жүретін соғыс машинасын жасайды деп болжауға болады. Оның басты артықшылығы — ұрыс даласында қолдануға ыңғайлы әрі арзан. Оның үстіне әдеттегі машина сияқты жүргізуге болады, арнайы оқудың қажеті жоқ.

«Хаски» қалай соғыс машинасына айналатынын 2020 жылы «Азия Авто» мамандары көрсеткен.