Иран Lada модельдеріне қажет бөлшек жеткізуді ұсынды деген ақпарат біраз уақыт бұрын шыққан. Иранның Қосалқы бөлшек өндіру қауымдастығы директорлар кеңесінің төрағасы Наджафи Манеш пен Еуразиялық іскерлік кеңестің ресми өкілі Мирзаи Гази Аббас Мослем 2022 жылдың аяғында және 2023 жылдың басында осы тектес ұсыныс жасады.
Енді сауда, өнеркәсіп және жер қойнауын пайдалану министрінің орынбасары Фаршад Могими MIMS Automobility Moscow 2024 көрмесінде осы тақырыпты тағы қозғады. Бірақ оның дәл қандай бөлшек туралы айтқаны белгісіз. Бұрын автоөндіруші конвейер детальдарын, Lada, Renault бөлшектерін алады деген болжам жасалған.
Қазір санкция шырмауында қалған Ресей өндірушілері қажет затын Қытайдан алып отыр. Бірақ аспан асты елімен есеп айырысуда бірқатар қиындық бар. Ал РФ мен Иран соңғы екі жылда жақсы араласа бастағанын ескерсек, ақша аударуға қатысты мәселе тумайтын сияқты.
Дегенмен Иран автомобильдерінің Ресейдегі жағдайы жақсы деп айта алмаймыз. Saipa маркасы былтыр саудасын бастамай-ақ кетіп қалды, IKCO машиналарының да болашағы бұлыңғыр. Оның үстіне, олар күллі әлемді жаулап жатқан қытай брендтеріне төтеп бере алмайтыны анық.
Мәскеу халықаралық автосалоны 19-22 тамызда өткен. Оған Қытай, Үндістан, Түркия, Беларусь және т.б. елдердің автоөндірушілері мен бөлшек жеткізушілері қатысты.
Комментариев: 0