Ирандағы Автобөлшек өндірісі ассоциациясы директорлар кеңесінің төрағасы Наджафи Манеш Ресеймен бірге автокөлік өндіру туралы келісім жасауды көздеп отырғанын айтты. РИА «Новости» тілшісі қойған сұраққа Манеш «Біз мүмкіндікті пайдаланып, жағдай өзгерсе де бірге жұмыс істей алатындай, ұзақ мерзімді жоспар құруға тиіспіз, — деп жауап берді.
Одан бөлек Манеш Ресейде автобөлшек жасайтын өндіріс орнын ашуға қызығушылық танытты. Оның айтуынша өндірушілер бірнеше бағытта серіктес болуды қалайды. Иран Ресей нарығына екі көлікпен шығады деген мәлімет те расталды. Бұл Мәскеудегі көрмеде таныстырған «Тара» және «Шахин» модельдері, — деген Манеш машиналар қазір сынақтан өтіп жатқанын, соның арқасында 25 градустық аязға шыдайтынын атап өтті.
Болжам бойынша алдымен IKCO Tara сатыла бастайды. Hyundai Solaris-пен деңгейлес шағын седан 5 сатылы механика не 6 сатылы автоматпен жұмыс істейтін 113 ат күшіне ие 1.6 литрлік мотормен жүреді. Онымен бір кластағы SAIPA Shahin (112 а. к.) келер жылы көктемде сертификат алады. Өз отанында бұл машиналар шамамен 12 мың доллар тұрады.
Ендігі қалғаны — Ресей тұрғындарын ирандық көлік мінуге көндіру ғана.
Комментариев: 0