Sensuous Sportiness стилінде жасалған төртінші буындағы Hyundai Tucson 2020 жылы көпке көрсетілген, ал бізге биыл ғана жетті. ЕЭО нарығына арналған кроссовер кеше Ресей жұртының назарына ұсынылды.
Сырттай машинаның жаһандық нұсқадан еш айырмашылығы жоқ. Ал мотор гаммасына келер болсақ, базалық қозғалтқыш — 2 литрлік бензинді атмосфералы мотор. Ол 150 ат күші мен 192 Нм момент береді. 186 ат күшіне ие (416 Нм) 2 литрлік турбодизель одан бір саты жоғары тұрады. Ал ең қуаттысы — 2.5 литрлік (190 а. к.; 242 Нм) агрегат. Hyundai өкілдері атмосфералы мотордың АИ-92 құюға бейімделгенін атап өтті.
Қарапайым Tucson алдыңғы не толық жетекпен ұсынылады. 6 сатылы механика мен автоматтың бірін таңдауға мүмкіндік бар. Анағұрлым қуатты мотор тек 8 сатылы автоматпен және толық жетекті HTRAC трансмиссиясымен жұптасады.
Ресей нарығына модель төрт нұсқада шығады. Бағасы 1 869 000 рубльден (10.9 млн теңге) басталады. Көліктің Visioner деп аталатын арнайы нұсқасы да бар. Максимал жиынтықтағы машина басқалардан өзгеше, әрі бірнеше ерекше түсте ұсынылады. Бұл көлікті 2 419 000 (2.5 литрлік, бензин) және 2 999 000 (2.0, дизель) рубльге, яғни 14.1 және 17.5 млн теңгеге сатып алуға болады.
Жаңа Hyundai Tucson-ның біздің елдегі тұсаукесері қашан болатыны белгісіз, бірақ ол уақыт алыс емес сияқты. Кроссовер марканың Алматыдағы зауытында құрастырылады.
Комментариев: 0