Hyundai келер жылдан бастап жеке үйде пайдалануға арналған электромобильді кешенді қуаттау жүйесін сата бастайды. Ол Tesla-ның Solar + Powerwall жүйесі секілді төбедегі күн панелі, стационар батарея және үйде қуаттау құрылғысын қамтиды. Осылайша автоөндіруші электрлі көлік иелерін қызметтің толық спектрімен қамтамасыз етеді. Қазір шетелде толық өлшемді отбасылық SUV жақсы сатылып жатыр. Енді осы қатарға экологиялық таза көліктер де қосылатыны анық.
Солардың бірі — LA автошоуында көрсетілген, дөңгелек базасы 3.2 метр болатын концептуалды Hyundai Seven кроссовері. Seven E-GMP платформасына негізделген. Машинаның жүріс қоры 480 шақырым, небәрі 20 минутта 80 % қуаттауға болады.
Seven бірнеше жылдан кейін Hyundai Ioniq 7-ге айналады, сол кезде асимметриялы есіктер (сол жақта жүргізуші есігі ғана бар) мен диванды қамтитын Premium Lounge салоны сақталмайтын шығар. Бірақ машина жетілдірілген автопилотпен жабдықталады, шанақ пішіні де сол күйінде қалады. Seven жүргізуші орындығының оң жағындағы шынтақ тірегіштен шығатын джойстик арқылы басқарылса, Ioniq 7-де дәстүрлі рөл немесе штурвал болады.
Бес метрлік Kia EV9 де Hyundai Seven сияқты E-GMP платформасына негізделген, сондықтан олардың техникалық сипаттамасы ұқсас, әр оське бір немесе екі электромотор орнатуға болады. Арт жағы көлбей созылған «жетілікке» қарағанда, Kia жолсыз жермен жүруге әлдеқайда ыңғайлы. Басқаша айтқанда Hyundai бала-шағасы бар клиенттерге, ал Kia белсенді өмір салтын ұстанатын жандарға арналған.
Клиенттер арасында осындай айырмашылық болғанымен, машина сатып аларда оның сырт пішіні шешуші рөл ойнауы мүмкін. Бұл тұрғыда EV9 сәтті шыққан секілді. Өйткені концептіні BMW-ның бұрынғы бас дизайнері Карим Хабиб дайындаған.
Kia EV9-дың ерекшелігі ретінде төбедегі рейлинг, капоттағы фотоэлементтері бар панель, үстелге айналдыруға болатын екінші қатардағы орындықтарды (алдыңғы орындықтарды артқа бұрып, үшінші қатармен біртұтас аймақ қалыптастыруға болады) атауға болады. Бұдан бөлек үлкен панорамалы шатыры мен 27 дюймдік мультимедиа экраны бар. Сериялы өндіріс тұрғысынан айтсақ, Kia EV9-дың Hyundai моделіне қарағанда әлдеқайда шынайы екені анық. Бірақ ол да 2024 жылға қарай жарыққа шығады.
Комментариев: 0