Hyundai Санкт-Петербургтегі зауытын сатуы мүмкін

Биыл ақпанда Ресей-Украина қақтығысы басталғаннан кейін Сестрорецкідегі Hyundai зауыты көлік өндіруді тоқтатты. Онда Hyundai Solaris (Accent), Creta, Kia Rio және Rio X қатарлы төрт модель толық циклда (дәнекерлеу және шанақ бояу) шығатын. Қолда бар ақпаратқа сенсек, кәсіпорын жақын арада өндірісті қайта бастамайды.

Зауыт жабық тұрса да компания салық пен электр энергиясы ақысын және жұмысшыларға жалақы төлеуді тоқтатқан жоқ. Бірақ басшылар пайда әкелмейтін активке қаржы бөлгісі келмей отыр. Оның үстіне санкцияға байланысты бас офис пен Ресейдегі филиал арасында ақша аудару қиындап кеткен.

Dong-a ilbo басылымы хабарлағандай, Hyundai мәселені шешудің түрлі жолын қарастырып жатыр, тіпті «Хёндэ Мотор Мануфактуринг Рус» (ХММР) зауытын сатуы мүмкін. Бірақ соңғы шешімді қабылдауға асықпайды, өйткені қазір кәсіпорынды сатып алатын адам табу да оңай емес.