Ресей электромобиль үшін сұралатын утиль алымын 33 есе көтереді

Ресей автоөндірушілерінің утиль алымын өсіру керек деген үндеуі биліктің құлағына жетіп, қолдау тапты.

Мемлекеттік Думаның Өнеркәсіп және сауда комитеті үкімет басшысына сауал жолдады, онда отандық өндірушілердің ұсыныстары нақты аталған. «Ведомости» басылымы хабарлағандай, комитет алымды биылдан бастап 2030 жылға дейін жыл сайын индекстеу керегіне сенімді.

Комитет биыл қозғалтқыш көлемі 1-2 литр жеңіл автомобиль үшін утиль алым мөлшерін 556.1 мың рубльге (қазіргі тарифтен екі есе көп) көтеруді ұсынды. Жүк көлігі үшін 1.7 есе, тіркеме мен жартылай тіркеме үшін екі есе, әртүрлі арнайы техника үшін 3-5 есе артады.

Электромобиль үшін утиль алым 33 есе өсіп, елге кірген әр көліктен 1.1 млн рубль сұралады.

Комитет мұндай шара шетелдік (Қытайды меңзеп отырғаны анық) компанияларды Ресейде жаңа өндіріс орындарын салуға итермелейді деп үміттенеді.