Hyundai-ні жөндеуге 104 мың еуро кетеді

2016 жылы неміс кәсіпкері сирек кездесетін ix35 (Tuscon) сатып алды. Автомобиль отын ұяшықтарынан қуат алатын күштік құрылыммен (FCEV) ерекшеленеді. Бренд модельді тәжірибе ретінде шығарып, оны 2013-2019 жылдары санаулы адамға сатыпты, кейін ix35-ті жол талғамайтын Nexo-ға ауыстырған.

Жеті жыл бойы ix35-ті пайдалануда ешқандай қиындық болмаған. Жанармай бекеттерінің жоқтығы да жүргізушіні алаңдатпапты. Сутек қорын толтыратын ең жақын станцияға жету үшін ол 114 шақырым жүруі керек. Ал ix35-тің бір багының жалпы жүріс қоры — 500 шақырым.

Кроссовер 84 мың шақырымнан аса жол жүргеннен кейін ақау шығып, оталмай қалған. Сервисте отын ұяшықтарының істен шыққанын анықтады. Оны ауыстыруға 104 мың еуро кетеді екен, оның ішінде 84 875 еуро — бөлшектің салық қоспағандағы құны. 2016 жылы кәсіпкер машина үшін 50 200 еуро санап берген деп жазды AutoBild.

Жүргізуші бұл жағдайға қатты таңғалды. Hyundai компаниясы да бұл қиын мәселе екенін, ix35-тің күштік құрылымы тәжірибе ретінде жасалғанын, бұған модельдің шектеулі данасы шыққаны да әсер етті деді. Өндіруші жөндегеннен пайда жоқ екенін мойындап, мәселені шешу жолын іздеп жатқанын хабарлады.

Заманауи сутекті Nexo иелері осы секілді жөндеу жұмысына әлдеқайда аз ақша жұмсайды. Отын ұяшықтарының келесі буыны 41 650 еуро тұрады, ол 10 жыл не 5 мың сағат пайдалануға жарамды.