BMW сутекті автокөлік шығаруға бел шеше кіріскен сияқты. Автоөндірушінің осы салада зерттеу жүргізіп жатқанына көп жыл болды, компания тіпті бірнеше концептісін таныстырды. Солардың бірі — Х5-ке негізделген BMW i Hydrogen Next. Қазір кроссовердің серия алды нұсқасы дайын, ол Мюнхендегі IAA көрмесінде жұрт назарына ұсынылады. Сол жерде қалағандардың көлікті жүргізіп көруге мүмкіндігі бар.
Сырттай сутекті X5 әдеттегі қозғалтқыш қойылған көліктен қатты ерекшеленбейді. Оның тек бампері мен «танауындағы» торы өзгеше, машинаға 22 дюймдік дөңгелек орнатылған. Салонда көк түсті қондырмалар көзге түседі.
Көліктегі ортаңғы тоннель мен артқы диван астына қысымы 700 бар болатын алты келі сутек сыятын композитті баллондар орнатылған. Электр өндіретін жылу элементтері капот астында тұр. Оларды компания Toyota-дан алады. Ал артқы осінде электромотор бар. Сутекті X5 артқы жетекті.
Көліктің ең жоғарғы 374 күші уақытша, яғни батареялар отырғанша сақталады. BMW олардың сыйымдылығына қатысты ақпарат бермеді. Қуаты азайғанда мотор электрохимиялық генератор көмегімен 170 күш береді.
Қазір модель сынақтан өтіп жатыр. X5 2022 жылы өндіріле бастайды, алайда ол аз тиражбен жарық көреді.
Комментариев: 0