Hyundai мен Kia 200 мыңнан аса электрокарын сервиске шақырады

Hyundai АҚШ-та 200 мыңнан аса электромобилін кері шақырады. Бірқатар Hyundai, Kia және Genesis моделінің қуаттауды басқару блогын (ICCU) тексеру қажет, мұндай ақау қуаттың жоғалуына себеп болуы мүмкін. Бұл жайлы ақпарат 2023 жылы пайда болған, АҚШ-тан өзге елдерден де шағым түсіп жатыр.

Hyundai — Ioniq 5 және Ioniq 6 моделін, Kia — EV6 кроссоверін, ал Genesis премиум бренді GV60 және GV70 Electrified-ті сервиске шақырады. АҚШ-тағы кампания 2021–2024 жылдары шыққан 62 872 Kia және 145 235 Hyundai мен Genesis-ті қамтиды.

ICCU модулінен ақау шыққанының белгісі — қуат кемиді және аспаптар панелінде ескерту пайда болады. Сервис оталығында мамандар модульді тексеріп, қажет болса толық ауыстырады немесе бағдарламалық жасақтаманы жаңартады.

Kia-ға былтыр жазда EV6 иелерінен машина қуаты кенет азайғаны туралы шағым түскен. Өндіруші проблеманы зерттеп, ICCU-ға шамадан тыс күш түскенде 12 вольтты батареяның қуаты бітіп, өзге бөлімдердің жұмысында кемшілік пайда болады деген қорытындыға келді.

Биыл көктемде Hyundai Оңтүстік Кореяда дәл осы модельдерді ICCU ақауына байланысты сервиске шақырған. Кампания 170 мың автомобильді қамтыды.