Hyundai Elexio-ның техникалық сипаттамасы белгілі болды

Қытайдың өнеркәсіп министрлігі әдеттегідей жаңа машина туралы алдын ала мәлімет таратты. Hyundai Elexio электрокроссоверінің дизайны қандай болатыны мамырдың басында анықталған.

Elexio кәріс бренді қытайлардың қалауына сай арнайы жасаған эксклюзив өнім саналады. Бірақ технологиялық жағы өзге модельдерге ұқсайды.

CarNewsChina хабарлағандай, Elexio-ның ұзындығы — 4.6 метр, дөңгелек базасы — 2.75 метр, салмағы — 2039–2184 келі. Автомобильдің алдыңғы және толық жетекті нұсқасы бар. Моно жетекті түрленімнің күштік құрылымы 217 ат күшін береді, ал қос моторлы нұсқасының қуаты — 312 ат күші. Ең жоғары жылдамдығы сағатына 185 шақырымнан аспайды.

Elexio-ның жүріс қоры CLTC циклінде 700 км-ге жететіні белгілі. Автомобиль BYD құрамындағы FinDream компаниясы өндірген LFP батареясымен жүреді.

Модельді Beijing Hyundai деп аталатын Hyundai мен BAIC бірлескен кәсіпорны шығарады. Электромобиль 2025 жылдың III тоқсанында жарық көреді, бағасы — 140 000 юань (10.2 млн теңге).