Hyundai Elantra АҚШ-та ең көп ұрланатын көлік атанды

Кореяда шыққан автомобильдерді ұрлау аса қиын емес, соған сай Hyundai-Kia өнімдері АҚШ-та қылмыстық элементтердің сүйікті олжасына айналып отыр.

Сақтандыру саласындағы қылмыспен күрес бюросы (NICB) хабарлағандай, 2023 жылы елде ең көп ұрланған автомобильдер — Hyundai Elantra (48 445 дана), Hyundai Sonata (42 813) және Kia Optima (30 204).

Бұл тізімге Америкада шыққан Chevrolet Silverado 1500 (23 721 дана) және Ford F-150 (15 852) енген. Қылмыскерлер бұдан өзге Kia Soul (21 001), Kia Forte (16 209), Kia Sportage (15 749) және Honda Accord (20 895) пен Civic (19 858) моделіне қызығады.

Былтыр миллионға жуық АҚШ тұрғыны машинасынан айырылды, бұл 2022 жылғы көрсеткішпен бірдей. Полиция 85 %-ын кейін иесінің қолына тапсырыпты, оның үштен бірі бір тәулік ішінде табылған. Демек ұрлықтың көбі тапсырыспен емес, әдеттегі бұзақылық мақсатта жасалады.