Nikkei Asia басылымы хабарлағандай, Honda өз елінде модельдер топтамасын қысқартады. Келесі жылы наурызға дейін Саямадағы зауыт жабылады, онда қазір Legend бензинді-электрлік седаны, экологиялық таза Clarity (гибрид және сутекті нұсқада) мен Odyssey минивэні құрастырылады. Себеп қарапайым: үшеуіне де сұраныс төмен, сондықтан келешегі күмәнді көліктерді дамытуға қаражат жұмсаудың экономикалық мәні жоқ.
Clarity седанының қатардан шығуы көп ешкімнің назарын аудармайтын секілді. 2015 жылы ол үш нұсқада шығарылды: сутекті, электрлі және гибрид. Бірақ бұрыннан өте аз сатылатын көліктің, жыл сайын бірнеше мың данасы ғана өтеді. Былтыр электрлі нұсқасының өндірісі тоқтаған, енді өзгелерімен қоштасатын кез келді.
Толық жетекті, жақында ғана жетілдірілген автономды басқару жүйесі орнатылған Legend седанының тарих қойнауына кеткені өкінішті. Шетелдік нұсқасы — Acura-ның өндірісі бұдан ерте тоқтаған. Былтыр Жапонияда Legend седанының 216 данасы ғана өтті, мұндай аз сатылым конвейердің шығынын да өтей алмайды. Odyssey жайлы айтсақ, бұл өте ескі модель (2013 ж.), кезекті рет рестайлингтен өткізудің еш пайдасы жоқ. Оның үстіне жапондар мұндай машиналарға қызықпайтын болған, олар көбіне ыңғайлы кей-карды таңдайды. «Одиссейдің» америкалық нұсқасы Honda-ның Алабамадағы зауытында жалғасты шығарылады.
Комментариев: 0